مسارح وسيما وسيرك وأفيش
وصورة المنيل وكاب الشاويش
وكلب الحراسة وكرسى الرياسة
وحبة سياسة وطربة حشيش
تذاكر يا هانم تذاكر يا بيه
هاتدخل بعيل تحاسب عليه
جميع اللى ماتوا عيالى الصغار
جميع اللى عاشوا ملوك القمار
تدخن يا باشا سجايربهاش (حشيش)
وتنسي اللي ميت وتنسي اللي عاش
وتقلع هدومك وتلبس همومك
وتاكل سمومك بكل انتعاش
تكية بهيه وكشك السعاده
ودمك يا حلوه يا سكر زياده
وصرخة بناتك وشرخة دياتك
شهادة وفاتك في حالة عباده
تذاكر يا هانم تذاكر يا بيه
هاتدخل بعيل تحاسب عليه
جميع اللى ماتوا عيالى الصغار
جميع اللى عاشوا ملوك القمار
عزيزي المواطن عزيزي الفقير
امالك في بكره بتنقص كتير
بتنقص بلادك اراضي و بيوت
وتنقص ولادك تابوت فوق تابوت
حياتك يا فندي حياه ماتساويس
فايه اللي يجبر جنابك تعيش
ما بينك يا باشا وبين الحياه
حواجز و شيش خلف شيش خلف شيش
سيناريو العجايب عجيب العجاب
تموت البراءه وتحيا الكلاب
وتصنع مهازل وتهدم منازل
وتعمل عوازل مابين الصحاب
اتاري اللي ميت قتيل الغرام
واتاري البلد دي بتهوي الكلام
وتهوي البنادق وتهوي الخنادق
وتهوي اللي صادق في صورة عضام
